Panchkula court-ah Honeypreet Insan a inlan

Kum 2017 August thlaa Haryana-a Panchukla leh Sirsa-a Dera Sacha Sauda pawlten tharum thawhna nasa tak an thlen kaihhnawiha mawhphurtua puh, an man zui tak Honeypreet Insan-i chu nimin khan Panchkula court-ah hruai a ni.

Honeypreet Insan-i hi hi Dera Sacha Sauda hotu, Gurmeet Ram Rahim Singh-an fa atana a lak a ni a, a hming tak chu Priyanka Taneja a ni. Nikum October 3 khan Haryana Police-ten an man a ni.

Ram Rahim hi nikum August 25 khan amah zuitu hmeichhe pahnih pawngsuala puhna thubuaiah thiam loh chantirin kum 20 tang tur leh, cheng nuai 30 chawi tura hrem a ni. Hei vang hian amah zuitute chuan buaina nasa tak an chawk chhuak zui a, tharum thawhna thleng vang hian mi 38 thiin midang 264 in hliam an tuar a ni. Honeypreet-i hi buaina chawk chhuak turin Dera Sacha Sauda member ṭhenkhat chu fuihin, pawisa pawh cheng vaibelchhe 1.25 a pe nia puh a ni.