SC-ah two-child policy kalpui tura ngenna thehlut

Ramchhunga mihring pung chak lutuk venna kawng khat leh, natural resource humhalhna tur kawng khat atana fa pahnih chauh neih phalna, two-child policy kalpui tura ngenna chu Supreme Court-ah thehluh a ni.

Supreme Court-ah hian National Commission to Review the Working of the Constitution on Population Control-in rawtna a lo siam tawh behchhana two-child policy kalpui tura ngenna hi mi pahnihin an thehlut a ni. A pakhat zawk chu acitivist Anupam Bajpai niin, mihring pung chak lutuk chu sorkarin a ngaihven tak tak a hun tawh a ni a ti a, hei hi ngaihven a nih loh chuan ṭhangṭhar lo awm turte chu nun hrehawm takin an awm thei dawn a ni, a ti. Mihring pung chak lutuk hian environment bakah, water leh air pollution, global warming thlengin a nghawng niin a sawi.

Petition thehluttu dang hi BJP hruaitu leh Supreme Court advocate Ashwini Upadhyay a ni a, India ram pumah fa pahnih chauh neih phalna dan hi hman ngei a duh thu a sawi. Upadhyay chuan Parliament, State Assembly leh local body inthlana chuh tumte tan te, political party din tum te, party office bearer tur te, sorkar-a hna dil tur leh subsidy dawng turte tan pawh critiria-ah two-child policy hi telh ngei se a duh thu a sawi a ni.

Two-child policy chungchanga PIL pahnih thehluh hi tunkar chhung hian Supreme Court chuan a ngaihtuah rin a ni.