SC judge atan hmeichhia pathum thlang chhuak : CJI hmeichhia ni thei hmasa ber tur Nagarathna

Justice N V Ramana kaihhruai Collegium-in Supreme court-a judge hna ruak hnawhkhattu tur mi pakua a thlanchhuah zingah hmeichhe hming pathum a lang a, an zinga mi Karnataka High Court justice B V Nagarathna chu hmeichhia zinga chief justice of India hmasa ber a ni thei dawn a ni.

Nagarathna bakah judge atana hming an chhawpchhuah dang te chu - Telangana HC CJ Hima Kohli (parent HC Delhi), Justice Bela M Trivedi of Gujarat HC (Gujarat Judicial Service aṭanga bul ṭan), Karnataka CJ A S Oka (parent HC Bombay), Gujarat HC chief justice Vikram Nath (parent HC Allahabad), Chief Justice of Sikkim HC J K Maheshwari (Parent HC Madhya Pradesh), Justice C T Ravi Kumar leh M M Sundaresh (both parent HC Madras) te an ni.

Additional solicitor general hlui P S Narasimha chu bar aṭanga direct-a SC Judge tura rawt chhuah awmchhun a ni.

Collegium rawtte hi lak thar an nih chuan Suprme Court-a judge awm thei zat 34 chu hnawhkhah a ni thei ṭep dawn a, mahse nimin khan Justice Navin Sinha chu a hna aṭangin a chawl (retire) a, hei vang hian a hmun hi a ruak leh rih dawn a ni.

Judge atana hming pakua chhawpchhuah te hi sorkar laipuiin an pawmpui chuan SC judge-te hi state tlemte a, Maharashtra, Delhi, Karnataka leh Tamil Nadu-a mite chauh an ni dawn a ni. Collegium hian judge tura rawtna a siamah hian hmarchhak state lama judge-te a ngaihthah ṭhin niin a lang. Kum 15 liam ta chhung khan hmarchhak state-te hian SC judge pathum - H K Sema, M K Sharma leh Ranjan Gogoi te chiah an la nei a ni.

SC judge atana mi pakua thlan chhuahte'n senior judge tam tak an luahlan (supersede) niin a lang bawk. Hei vang hian he rawtna hian SC constitution bench rorel dan, Judges-selecting-Judges system-in judge thlan a ram bial anga inkhairual leh multi-cultural balance nei thei tura a lo duan chu a bawhchhia nia sawi a ni. Himachal Pradesh, Odisha, Jammu and Kashmir, Chhattisgarh-te hian hun rei tak chhung SC-ah hian aiawh an nei tawh lo a, hemi hna chelh thei tur Judge senior awm mah se Thawhlehnia Collegium thlan chhuah zingah hian an tel lo thung.

Collegium rawtna hi sorkarin a pawmsak a, Supreme Court judge tharte hi ruat fel an nih chuan justice B V Nagarathna hi kum 2027-ah chief justice of India a ni thei dawn a ni. Justice Nagarathna hi kum 1962, October 30-a piang niin, a pa chu CJI 19-na, Engalaguppe Seetharmiah Venkataramiah a ni..