Chhattisgarh sorkarin ram nei lote chhawmdawlna pe dawn

Chhattisgarh sorkar chuan nimin khan state chhunga ram nei lo, chhungkaw nuai 12-te chhawmdawlna pekna tur 'Rajiv Gandhi Grameen Bhumihin Majdur Nyay Yojana' scheme a hawng.

He scheme hi July 28 khan chief minister Bhupesh Baghel chuan state legislature-ah a lo puang tawh a, financial year 2021-2022 supplementary budget-ah he scheme atan hian cheng vaibelchhe 200 dah a lo ni tawh a ni.

Thingtlang lama cheng ram nei lo, nitina inhlawhfate chhawmdawlna turin he scheme hi duan a ni a, kumtin Rs 6,000 pek an ni ṭhin ang. MGNREGA leh contract worker-te thlur bing an ni ang a, mahse a ṭul angin barber, blacksmith, dhobi leh puithiamte pawh huam tel an ni ang. He scheme hnuaia chhawmdawlna dawng thei tan kumin November 30 thlengin an inziahluh theihna tur portal chu sorkarin a siam bawk.