Hri kai thar 40% dawnin pung leh

India ramah Thawhlehni khan Covid-19 hri kai thar mi 35,178 an awm belh leh a, Thawhṭanni aiin hri kai thar hi 40% dawnin an tam zawk a ni.

Thawhlehni khan hri vanga thi mi 440 awm belhin, ram pumah hri len tirh aṭangin coronavirus kaihhnawiha thi hi mi 4,32,519 an awm tawh.

Nitina hri kai hmuh thar, daily positivity rate chu 1.96% niin, ni 23 chhung chu 3% hnuai lamah a awm tawh. Weekly positivity rate pawh 1.95% a ni bawk a, ni 54 chhungin 3% hnuai lamah a awm tawh bawk a ni.

Hri kai mek, active case 3,67,425 awmin hei hi ni 148 chhunga a hniam ber ṭum a ni a, hri kai hmuhchhuah tawh zingah active case hi 1.4% an ni. Hri kai enkawl dam, recovery rate pawhin hma a sawn zel a, 97.52% tling chhoin nikum March thla hnu lamah a ṭhat ber ṭum a ni bawk.