ED-in Nirav Modi-a luxury car 9 laksak

Enforcement Directorate (ED) chuan Punjab National Bank (PNB)-a cheng vaibelchhe 11,400 inbumna thleng kaihnawihah lunghlua sumdawng lian Nirav Modi leh Mehul Choksi-te group share leh mutual fund cheng vaibelchhe 94 hu chu khawih chet theih lohin a hreksak.

ED-in a mutual fund leh share a hreksak zinga cheng vaibelchhe 7.80 hi Nirav Modi-a group ta niin, Mehul Choksi Group ta cheng vaibelchhe 86.72 a tel bawk.

Investigating agency hian Modi-a luxury car 9 a laksak bawk a, hengte hi Rolls Royce Ghost pakhat, Mercedes Benz GL 350 CDI pahnih, Porsche Panamera pakhat, Honda car pathum, Toyota Fortuner pakhat leh Toyota Innova pakhat an ni.

Nirav Modi hian a company-a thawkte chu hna dang zawng turin a hrilh tawh nia sawi a ni. Hnathawktute hnenah an company hma lam hun chu a chiang lo hle a, hei vang hian kawng dang an dap a ngai tawh tih a hrilh a ni.

CBI leh ED chuan bank aṭanga Letter of Understanding dik lo taka lak nia sawi chungchangah FIR pahnih an ziaklut ve ve tawh a, hetih lai hian Modi leh Choksi-te hi an laka thubuai ziahluh a ni hmain India ram an chhuahsan hman a ni.

Supreme court chuan PNB-a buaina chungchang chhui hna chu sorkarin a duh angin a kalpui tur a ni, a ti. Hemi rual hian agency-ten he buaina chungchang an chhui hna hi an thawk ṭha lo a nih chuan a inrawlh tur thu a sawi bawk. He thu hi court-ah PNB buaina chungchanga a hrana chhui a, India rama Nirav Modi-a hruai kir a nih dan ngaihtuah tura PIL thehluh a ngaihtuahnaah a sawi a ni.