Covid-19 kai thar 9,971 an awm Kai hmuh chhuah tam ber ni a thleng leh
India ramah hripui leng kai thar an pung zel a, nimina Ministry of Health and Family Welfare report tihchhuahah chuan kai hmuh chhuah thar mi 9,971 an awm leh a, kai hmuh chhuah tam ber ni thleng lehin ni eng emaw zat chhung chu kai hmuh chhuah tam ber ni a thleng chho tawh.
Ram pumah Covid-19 kai mi 2,46,628 an awm tling ta a, enkawl dam 1,19,293 awm tawhin mi 1,20,406 laiin an kai mek a ni. Thihpui 6,929 an awm tawh bawk.
Health Ministry report tihchhuah hma darkar 24 chhungin enkawl dam mi 5,220 lai an awm thung a, thihpui 287 an awm bawk. Enkawl dam rate pawhin hma a sawn hreta, 48.36% a tling chho thei a, hetihlai hian thihpui rate hi 2.80% a ni ve thung.
Hri kai hmuh chhuah thar 9,971 an awm takah hian hri kai tam lamah India chuan Italy a khum ta a, India ram chu hri kai tam ram paruknaah a awm ta a ni.
Indian Council of Medical Research (ICMR) chuan darkar 24 chhungin sample 1,42,069 an test thei tawh tih sawiin nimin thleng khan sample 46,66,386 an endik tawh a ni.
ICMR hian theihtawpin hma an la zel a, testing facility hmasawnna tur pawhin nasa takin hma an la zel a, tunah hian ram pumah Covid-19 test-na tura sorkarin a pawmpui laboratory 759 awm mekin sorkar laboratory 531 a awm a, private laboratory 228 a awm bawk a ni.