Canada PM leh PM Modi inkawm : Ram pahnihten inremna paruk an ziak

India rama kar khat cham tura rawn zin, Canada Prime Minister Justin Trudeau leh Prime Minister Narendra Modi-te chu nimin khan New Delhi-ah an inkawm. Ram pahnihte thawhdunna tur inremna paruk ziah a ni bawk.

Justin Trudeau leh Narendra Modi-te hian sumdawnna leh inlaichinna kawnga ram pahnihten inpawhna ṭha zawk an neih theih dante an sawi dun a, energy lama thawhdunna tur inremna pawh an ziak a ni.

Meeting an neih hnua joint press conference an neihah, PM Narendra Modi chuan Canada PM zin theih hun tur chu nghakhlel taka an lo thlir reng thu leh, a chhungte hruaia a rawn kal thei chu lawmawm a tih thu a sawi. Canada chu Indian zirlaite tan pawha hmun pawimawh tak a nih thu sawiin, tunah hian Indian zirlai nuai khat chuang an awm mek thu a sawi.

Canada PM lawmna inkhawm hi nimin khan Rashtrapati Bhavan ah buatsaih niin, PM Modi chuan Trudeau leh a chhungte hi a lo lawm a ni. Trudeau hian a nupui Sophie leh a fate pathum a rawn hruai a, Agra, Ahmedabad, Mumbai leh Amritsar-te an tlawh tawh a ni.