Delhi Police-ten CM ina CCTV camera 21 enfiah dawn

Delhi chief secretary Anshu Prakash-an Chief Minister Arvind Kejriwal-a chenna inah Thawhṭanni zan khan rorellai AAP MLA-te kut an thlak niin a sawi a, hemi chungchang chhuitu Delhi Police-te chuan nimin khan CM ina CCTV camera 21-a hard disk-te chu lain an enfiah dawn.

Chief secretary-in kut thlak a nih a sawi chungchang chhuitu Delhi Police team-ah hian cyber crime leh forensic expert-te pawh an tel a ni.

Chief Minister Kejriwal-a chuan police-ten a chenna in an dap chungchang hi a Twitter-ah tarlang nghalin, council of minister chuan Lieutenant Governor Anil Baijal hmuh an tum mek thu a sawi. CM chuan, " Police ṭhahnem tham tak ka chenna hmunah rawn tirh a ni. Vawi hnih an beng nia a sawi avangin CM chenna in pum chu dap a ni. Hetiang a nih chuan Judge Loya thih chungchangah hian Amit Shah hi engtikah nge thu zawhfiah a ni ve dawn" tiin a ziak.

Ningani tlaia vantlang inkhawma thu a sawiah, Kejriwal chuan "Officer-te chungah eng thu emaw i sawi chuan an lungawi lo nghal mai zel a ni. In tan, mipute tan ka bei zel a, mahse heng mi BJP, LG leh officer-te hian ka kawng dan an tum a ni. Mahse mipuite tan ka bei chhunzawm zel ang" a ti.

AAP thupuangtu Dilip Pandey pawhin Kejriwal-a kaihhruai Delhi-a AAP sorkar chu centre-a rorellai, BJP chuan tihchhiat tumin an theih angin a bei zel a ni, a ti. Pandey chuan, " CM chenna in pum chu CS-in vawi hnih an beng nia a sawi avangin dapin, kulh ang maia hual zui a ni. Hetih lai hian officer-ten AAP hruaitute kut an thlak lai, a finfiahna video pawh a awm ngei chungin party hruaitute kutthlaktu lakah action lak a ni si lo. BJP hian Kejriwal-a sorkar hi a mimal takin a bei zel a ni tih fiahna dang a ngai tawh lo a ni" tiin a sawi.