Rajasthan : Congress-in CM candidate puang dawn lo

Congress party chuan Ningani khan Rajasthan assembly inthlan neih turah an party chuan chief minister candiate a puang lawk dawn lo tih sawiin, hei hi an party kalphung a nih thu a sawi.

Party general secretary in-charge Rajasthan, Avinash Pande chuan assembly inthlan neih turah hian party hruaitute chuan hnehna chang ngei turin lungrual takin an thawk ho dawn tih a sawi. "Congress party tihdan phungah chuan inthlan hmain chief minister tur hi an puang lawk ngai lo. Inthlan zawh hnuah MLA thlan tharte nena an sawiho hnuah party high command chuan chief minister tur hi a thlang chauh ṭhin a ni. He kalphung hi Rajasthan-ah pawh kan vawng zel ang", a ti.

Congress president Rahul Gandhi chuan Ningani khan Rajasthan Congress hruaitute chu meeting a lo neihpui tawh bawk a, he hunah hian Chief Minister hlui Ashok Gehlot, state unit chief Sachin Pilot leh party hruaitu dangte pawh an tel.