India leh China sipaiten inremna siam duh
India leh China sipai hruaitu luten meeting an neihah, ram pahnihten tun hnaia ramri chungchanga buaina an neih mek chu inbiakna hmanga boruak ṭha tak hnuaiah inremna siam an remtih thu Foreign Ministry chuan a tarlang.
India lam hian remna kawng zawnga inbiakna neih pui tur hian China hi a sawm a, China lamin an remtih hnuah Inrinni khan Ladakh hmar lama Line of Actual Control (LAC) bula China huam chhung Maldo hmuna Border Personnel Meeting Point-ah inbiakna hi neih a ni.
Ram pahnih sipai hruaitute hian boruak ṭha tak hnuaiah inbiakna hi neiin, ramria remna leh muanna a awm theihna tura hma lak bakah, ram pahnihte hmasawnna lam pawh an sawiho a ni.
India aiawhte hi Commander of 14 Corps-a Lieutenant General Harinder Singh chuan a ho a, China lam hi Tibet Military District-a Commander chuan a ho thung.
Foreign ministry chuan kumin hi India leh China-in diplomatic relation an kalpui kum 70-na a nih thu a sawi. Tunhnaia ram pahnihte inkarah innghirnghona a awm chho ṭan a, May 5 leh 6 khan Pangong Lake-ah ram pahnih sipaite hi an inbei mai thei niin thuthang a awm a ni. Heng bakah hian India leh China inrina bula awm Galwan Valley region-ah dan dik loin India sipaite chuan China huam chhungah defence facility an sa tih China lam chuan a tarlang a, hei vang hian India leh China inkar hi a ṭha lo hle nia sawi a ni. Ministry of External Affairs thupuangtu Anurag Srivastava chuan ramria buaina kan neih chu chinfel thuai a nih tur thu leh muanna a awm vat tur thu a lo sawi tawh a ni.
India leh China ramri, Line of Actual Control hi kilometer 3,488 a thui a ni a, he line-ah hian tun hma aṭang pawhin buaina neuh neuh a lo awm tawh ṭhin a ni.