Amnesty-in human rights ngaihthahah ram hruaitute puh

Amnesty International-in Ningani-a annual human rights report a tihchhuahah, khawvel ram hruaitute chu mipuiten dikna chanvo an neih, human rights ngaihthah sakah a puh.

Report-in a tarlanah hian US President Donald Trump, Russia hruaitu Vladimir Putin leh China President Xi Jinping-te chu midangte dodal zawng policy-te siamah a puh a, Egypt, Philippines leh Venezuela hruaitute hming pawh a tilang tel bawk.

Khawvelah inhuatna leh hlauhna te a nasa chho hle a, hetihlai hian mipuiten dinhmun harsa an tawh mek karah human rights tunnun tuma beitu sorkar chu tlemte chauh an awm a ni, tiin Amnesty secretary-general chuan Salil Shetty chuan a sawi.

The State of the World's Human Rights report-ah hian Trump-an Muslim tamna ram parukte tana US-a zin luh khapna thupek a siam te, Venezuela thuneituten sorkar laka lungawi lohna lantirtute sipai chakna hmanga an nawr dan te, Philippine-a ruihhlo do beihpui thlakna dan loa mi tam tak tihhlum an nih chungchangte tarlan a ni.

Philippine President Rodrigo Duterte-an kum 2016, June thla aṭanga ruihhlo do beihpui a neih aṭangin Philippine ramah hian ruihhlo ti ṭhin leh a zawrhnaa inhnamhnawiha puh mi 20,000 zet thah an ni tawh niin report chuan a tarlang.