Vawiin aṭangin Delhi ramri hawng dawn

Delhi chief minister Arvind Kejriwal-a'n kar khat chhung Delhi ramri (border) a khar tir hnuah vawiin aṭangin hawn a ni leh dawn. 

Delhi ramri, Delhi-Noida leh Delhi-Gurugram border-te chu kar khat chhung khar a nih tur thu hi Kejriwal chuan a lo sawi tawh a, he hmalakna hi Delhi bika Covid-19 kai pung chho zelin ziaawm lam an pan theih nan leh damdawi-ina state dang mite an tam lutuk loh nana tih a ni. 

Nimin khan Kejriwal chuan Delhi-a sorkar leh private ṭhenkhat damdawi-inte chu Delhi a chengte tana hauhsak (reserved) an nih tur thu a sawi. Kejriwal chuan Delhi ramri khar a nih chhan pakhat chu state dang aṭanga Delhi damdawi-in hranga hranga enkawl an tam avang a nih thu a sawi a, hengte hi tihziaawm a nih theih nan kar khat chhung ramri khar hi a rawt phah ta a ni.

Covid-19 kai mai bakah dam lo mutna tur khum hi Delhi-ah hian indaihlohna a nasa chho ṭan a, hei vang hian Kejriwal kaihhruai sorkar chuan hma a la chho a ni. Delhi sorkar damdawi-ina khum 10,000 chu Delhi-a chengte tana dah a ni a, sorkar laipui hnuaia damdawiin khumte erawh chu Delhi bakah state dang mite tan hman theih vek a ni thung ang.  Heng bakah hian Delhi-a private damdawi-ina khumte pawh special treatment ngai tupawh tana dah a ni bawk.

Heng hmalaknate hi Kejriwal chuan doctor awmna special five-member committee rawtna anga an kalpui a nih thu a sawi a, he committee hian June thla tawpah hian Delhi-ah khum 15,000 mamawh a nih tur thu an sawi. Kejriwal chuan Delhi-a damdawi-ina khum 90% chu Delhi mite tana hauhsak turin Delhi-a chengten an ngen thu a sawi.

India ramah chuan Maharashtra leh Tamil Nadu tih loah chuan Delhi hi Covid-19 hri kai tam berna hmun a ni mek a, hri kai hi mi 27,654 an awm tawh a ni. Enkawl dam mi 10,664 an awm tawh a, he hri vanga thi hi mi 761 an awm tawh bawk. Damlo an tam avang hian Delhi-a damdawi-inah khum indaihlohna hi a punchhoh phah nia sawi a ni.