ED-in RJD hotu Misa Bharti-i farmhouse laksak

Enforcement Directorate chuan nimin khan Rashtriya Janata Dal (RJD) hruaitu Misa Bharti-i farmhouse an laksak. Misa Bharti-i hi RJD hotu lu ber, Lalu Prasad Yadav-a fanu a ni.

Kum 2017 December thla khan agency chuan Bharti leh a pasal, Shailesh Kumar-a lakah hian sum tihchingpen kaihhnawihah thubuai an lo ziak lut tawh a ni.

ED-in Bharti farmhouse a laksak hi south Delhi-a Bijwasan area-a 26, Palam Farm a ni a, Prevention of Money Laundering Act (PMLA) hmanga laksak a ni. ED chuan he ram hi Bharti-i hian kum 2008-09 sum tihchingpenna kaihhnawih ami, cheng vaibelchhe 1.2 in a lei niin ED chuan a sawi.

Kumin January thla khan ED chuan Lalu Prasad-a makpa dang, Rahul Yadav pawh Bihar CM hlui leh Lalu-a nupui, Rabri Devi hnena loan, cheng vaibelchhe khat pek a nih kaihhnawihah thu zawhfiah turin alo ko tawh bawk. Rahul Yadav-a hi Lalu Prasad-a fanu pali-na, Ragini-i pasal a ni.

Lalu Prasad hi ranchaw man tur pawisa tam tham tak tihchingpen thubuaiah thiam loh chantir a ni a, tunah hian Ranchi-a Birsa Munda jail-ah a tang mek a ni. January 6 khan Lalu hi kum thum leh a chanve tang turin special CBI court chuan a hrem a ni.