Kothari-te fapa ni 11 la hreng dawn

Bank-a loan bat cheng vaibelchhe 3,695 pek loh vanga man, Rotomac Global neitu Vikram Kothari leh a fapa Rahul-te chu Inrinni khan CBI court chuan thu zawhfiah tura ni 11 dang la hreng turin a ti.

Inrinni khan Kothari-te pafa hi court-ah hruai an ni a, CBI judge MP Chaudhari chuan judicial custody-ah a dah a, mahse a hnuah investigation agency ngenna angin CBI custody-ah a dah zui a ni.

Kothari-te pafa hi bank pasarih aṭanga loan tam tham tak an lakte thil danga hmanga puhin, bank bumah puh an ni. He thila inhnamhnawih zingah hian Vikram Kothari-a nupui, Sadhna pawh sawi tel a ni. Loan an lakna bank zinga pakhat, Bank of Baroda chuan February 18 khan FIR a thehlut a, he thubuai hi CBI kutah dah zui a ni.

Karnataka-a Udyambag police station-ah industrialist Gururaj Jainapur chuan Vikram Kothari hian a bum nia sawiin a lakah thubuai a thehlut bawk. Jainapur hi iron ore thawnchhuak ṭhin niin, kum 2010 khan Rotomac Global Pvt Ltd nen hian Goa aṭanga China-a iron ore ton 25,000 thawnchhuak turin inremna an siam a ni. Mahse sum inpek dan chungchanga intithiam loin, Kothari hian Jainapur dahbo tur hian contract killer a chhawr nia puh a ni.