Pawisa tihthih hmain PNB-ah Rs vchh 90 dah hman : Majeed Memon

Nationalist Congress Party (NCP) hotu leh criminal lawyer Majeed Memon-a chuan Prime Minister Narendra Modi-an pawisa note lian pahnih tihthih a nih thu a puan hma darkar rei vak lo chhunga khan Punjan National Bank-a branch pakhatah pawisa faiin cheng vaibelchhe 90 dah a ni tih a sawi.

Memon chuan he thil thleng hi chhui chian a phut tih sawiin, hemi chungchang hi PNB-a sum tak tak tihchingpennaa mawhphurtua puh, billionaire Nirav-an India ram a chhuahsan hnuah report a ni, a ti.

Kar kalta Inrinni khan sorkar laipui chuan PNB-a sum tihchingpen chungchanga inhnamhnawiha puh, ramdanga tlanchhe mek Nirav Modi leh Mehul Choski-te passport chu a lo sut tawh bawk. Kar hmasa khan Ministry of External Affairs (MEA)-a thuneitute chuan Enforcement Directorate (ED) thurawn angin Modi leh Choski-te passport validity chu kar li chhung atan a lo titawp tawh bawk.

Union Finance Minister Arun Jaitley-an regulator-te chu PNB-a dik lo taka thiltih chungchang an hmuhchhuah mai loh avanga a dem thu a sawi hnuah, Congress party chuan sorkar laipui a dem let ve leh. Congress hruaitu hlun Kapil Sibal chuan, "Engvangin nge regulator-te ringawt an dem? He thil hi finance ministry hian a hre tur a ni", a ti.

Nirav Modi hian January 1 khan India a chhuahsan a, a unaupa Belgian citizen Nishal pawhin hemi ni vek hian a chhuahsan bawk. Modi-a nupui Ami, US citizen chuan January 6 khan India chhuahsanin, Modi-a pu leh sumdawnna lama a thawhpui Mehul Choksi chuan January 4 khan India a chhuahsan bawk.

ED chuan Modi leh Choski-te hi PNB-a cheng vaibelchhe 11,400 tihchingpen kaihhnawiha inlan turin kohna a tichhuak tawh a ni.