Covid-19 vangin Taj Mahal khar

India ram rohlu Taj Mahal chu tun lai hri leng Covid-19 vangin nimin aṭang khan March 31 thleng khar a ni. Kumtina khualzin vei vakin an tlawh nasat em em, UNESCO-in World Heritage-a a chhinchiah, Taj Mahal chu tourism ministry chuan nimin aṭanga khar a nih thu sawiin, helai hmuna mi vei vak tam tak awm ṭhinte chu hri laka an himna tur atan tih a nih thu a tarlang. 

Khualzin ten an tlawh ṭhin India ramchhunga hmanlai thil leh hmun ṭhenkhatte chu khar a ni tawh a, museum-te pawh khar a ni tawh tih Tourism Minister Prahlad Patel chuan a sawi. Ramchhunga zirna in, cinema hall-te khar a nih bakah, mipui punkhawm pawhhmun hrang hrangah khap a ni tawh bawk. India rama Mughal rorel laia an in ropui tak tak sak te, hmun nuam tak tak te leh thil ropui tak tak an dinte hian kumtin tlawhtu a ngah thei hle a, nikum chhung ringawt pawh khan heng hmun hrang hrang tlawhtu hi ramdang mi maktaduai 7 chuang an tling a ni. 

South Asian Association for Regional Cooperation (SAARC) ram Afghanistan, Bangladesh, Bhutan, Maldives, Nepal, Pakistan, Sri Lanka leh India-te chuan video conference hmangin Covid 19 chungchangah inbiakna an buatsaihah, he hunah hian prime minister Narendra Modi chuan India-in he hri beih nan hian US dollar maktaduai 10 a thawh dawn tih a sawi. 

Covid-19 vei leh vei lote enna, test kit chu India ramah siam an awm lo a, ram danga lakluh vek a la ngai. Mahse hri leng avanga sorkarin zin kawngah khapna a siamte, hei hian airlines service thlenga a tihbuai tel avangin ramdang aṭanga test kit lakluh tur a nghawng a, indaih lohna nasa tak a awm phah a ni tiin Thyrocare Technologies Limited chuan a tarlang. 

Company chuan ram chhung dinhmun ngaihtuaha, ramdang aṭanga thlawhtheihna hmanga Covid-19 test kit lak luh chu phalsak turin a ngen. Mi tam zawkte an dinhmun enfiah an nih theihna turin test kit tam zawk mamawh a ni, a ti. India ramah hian March 13 thleng khan mi 5,900 chiah test an la ni tih Indian Council of Medical Research chuan a tarlang. Hetih lai hian World Health Organisation (WHO) chuan hri darh zel tur venna kawnga pawimawh tak chu test neih uar a ni tih sawiin, he hri vei nia rinhlelh apiang chu an dinhmun hrechiang tura test zel turin ram hrang hrangte a ngen mek thung. 

Covid-19 darh zel chungchanga India sorkar hmalakna chu World Health Orga­nisation chuan lawmawm a tih thu a sawi. Nimin khan New Delhi-a thuthar theh­darhtute'n an kawmnaah India-a WHO aiawh Hank Bakedam chuan India sorkar inpekna, Prime Minister Office thlenga an hmalakna chu a nasa hle a ni, a ti.

Maharashtra sorkar chuan inkhung hrang tura hriattirte chhinchiahna tur stamp a siam a, hemi hmang hian inkhung hrang tura tihte chu an kut vei lamah an chhinchhiah dawn a ni. 

Chhinchhiahna stamp atana an hman hi inthlana vote thlakte chhinchhiahna 'ink' tho kha a ni a, chief minister Uddhav Thac­keray chuan Thawhṭanni aṭangin he chhin­chhiahna hi hman ṭan a nih thu a sawi. Uddhav Thackeray chuan,"Inkhung hrang tura tih, damdawi-in emaw hotel emawa awm duh loa ina awm duhte chuan mawhphurhna an la ngam tur a ni. An leng vak tur a ni lo a, an inkhung hrang ngei ngei tur a ni," a ti.

Ministry of Health & Family Welfare chuan India-ah Covid-19 kai zat hi mi 126 an awm tawh a, mi pathumin an thihpui tawh tih a tarlang. India rama he hri kai mi 126 awm tawh zingah hian ramdang mi hi 22 an tel. Nimin khan Maharastra-a he hri vang hian kum 64 mi a thi leh a, a ni nen hian ramchhungah he hri vanga thi hi mi pathum an awm tawh a ni.