Bengal-a buaina chhuak chungchang CBI leh Special Team-in an chhui dawn

Calcutta High Court chuan West Bengal assembly inthlan kaihhnawiha state chhunga buaina chhuak chungchang chu Central Bureau of Investigation (CBI) leh Bengal Police Special Team-ten an chhui dawn tih a sawi.

High Court chuan buaina chhuaka pawngsual, inthah leh hmeichhe chunga pawikhawihna thleng chungchang chu CBI hian a chhui dawn a, tharum thawhna thleng kaihhnawihte chu IPS officer Suman Bala Saoo kaihhruai special Bengal Police team-in a chhui thung dawn tih a sawi. Team pahnihte hi kar ruk chunga report thehlut tura hriattir an ni bawk.

Inthlan kaihhnawiha buaina chhuak chungchang chhui tura petition lutte chu acting chief justice Rajesh Bindal kaihhruai member panga bench chuan a ngaihtuah a ni.

Hetihlai hian rorellai, Trinamool Congress chuan court thutlukna siam danah an lawm loh thu sawiin, TMC MP Saugata Roy chuan Bengal sorkar chuan court sang zawkah a zualko maithei tih a sawi. BJP erawh court rorel danah an lawm hle thung a, union minister Anurag Thakur chuan democracy ramah chuan mi tupawhin an ngaihdante sawi turin dikna chanvo an nei a, mahse tharum thawhna thlen erawh phal a ni lo, a ti.