Vaccine dose hnih la tawh zingah Hri kai 87,000 chuang awm

India ramah Covid vaccine dose hnihna la tawh zingah mi 87,000 chuangin hri hi an kai leh nia sawi a ni a, an zingah 46% chu Kerala state ami an ni.

Kerala-ah hian vaccine dose khatna la tawh zingah Covid-19 kai 80,000 dawn leh, a dose hniha la tawh zingah mi 40,000 velin hri hi an kai leh tawh bawk.

Indian Council of Medical Research (ICMR) chuan Chennai-a zirchianna a neihah, Delta variant chu vaccine la leh la lo pawhin a kai theih tih an sawi a, mahse vaccine la tawh zingah hri kai hi awm leh mah se, hri hi an la na lo deuh niin an sawi. Delta variant hi Covid hri inkaidarh awlsam tak niin, India ramah hri leng thawh hnihna na tak a thlen chhan ber pawh nia ngaih a ni.

Nilaini khan India ramah Covid-19 hri kai thar mi 36,401 awm belh lehin, a hma ni aiin hri kai hi 3.4% in an pung leh hret a ni. Hemi ni vek hian hri vangin mi 530 an thi a, India rama hripui thihpui tawh hi mi 4,33,049 an tling tawh.

Nitina hri kai hmuh thar, daily positivity rate chu 1.94% niin, ni 24 chhung 3% hnuai lamah a awm ta. Hri kai enkawl dam, recovery rate pawhin hma a sawn zel a, nimin khan 97.52% niin nikum March thla hnu lama a rate ṭhat ber ṭum a ni bawk.

Covid-19 R-value pakhat hnuailamah tla thla
Hri leng darh chak dan tehna, R-value chu August thla tir lama pakhat chunglama a san chhoh hnuah Kerala leh hmarchhak state-ahte hri lengin ziaawm lam a pan mek avangin a tlahniam ṭan niin mithiamte chuan an sawi. R-value hian coronavirus kai darh dan, hri kaiin midang a kaichhawn chak dan a entir a ni.

Mithiamte chuan August 14-16 chhunga R-value chu 0.89 niin an chhut. R value hi 1 hnuai lama a awm chuan hri hian kian lam a pan mek tihna a ni. "India-a R chu 0.9-ah a tla thla" tiin zirchianna neihnaa an hotu, Indian Institute of Mathematical Science ami Sitbara Sinha chuan a sawi.

India rama hri kai mek, active case tamna ber Kerala R-value pawh pakhat hnuailamah a awm tawh a ni. Tunkar tir lam khan Union Health Minister Mansukh Mandaviya leh central team-te chuan Kerala hi tlawhin, state chhunga Covid-19 hri leng mek dinhmun te an enfiah a ni.

India rama Covid-19 hmuhchhuahna hmasa ber, Kerala-ah hian hri leng thawh khatna hneh taka an lo hmachhawn avanga fakna an dawn hnuah state sorkar chuan hri leng thawh hnihna an hmachhhawn dan kawngah sawiselna a tawk nasa hle thung.

Sinha chuan hmarchhak state-te chu hri leng thawh hnihna an tuar zo tawh nia a lan thu a sawi bawk.

Covid-19 kai tamna Maha­rashtra-ah chuan R-value 0.89 a ni mek. Himachal Pradesh chuan R-value pakhat aia tam nei mah se tunhnai khan a tlahniam a ni. Tamil Nadu leh Uttarakhand te chuan R-Value pakhat an tling teuh hle tih Sinha chuan a sawi.

May 15 - June 26 chhung khan R-value 0.78 a ni a, hemi hnu hian sang chho lehin, June 20-July 7 chhungin 0.88, July 3-22 inkarah 0.95, July 24-27 inkar khan 0.96 a ni. Hri leng thawh hnihna hnua a vawi khatnan July 27-31 inkar khan R value 1.03 a kai chho a, hemi hnu hian tlakhniam lam a pan ṭan. August 6-9 chhung khan R value 0.92, August 12-14 inkarah 0.99 sang chho leh mahse August 14-17 inkar khan 0.89-ah a tla hniam leh a ni.