Bank scam dang haichhuak leh

Company-in dik lo taka thil a tih avangin Oriental Bank of Commerce-in cheng vaibelchhe 109 a hloh tih hriatchhuah leh a ni a, he thila inhnamhnawiha puh zingah hian Punjab Chief Minister Amarinder Singh-a makpa bakah midang 10 an tel.

Central Bureau of Investigation (CBI) chuan he thil thleng chungchang a chhuinaah Uttar Pradesh-a Simbhaoli-a private sugar manufacturing firm Simbhaoli Sugars Limited bakah he firm-a hotu, CMD, CFO, CEO leh director bakah bank official-te lakah inbumna hmanga puhin thubuai a ziaklut tawh a ni.

Simbhaoli Sugars Limited-a deputy director zingah hian Punjab CM Singh-a fanu Jai Inder Kaur-i pasal, Gurpal Singh pawh a tel. Gurpal Singh hi company pariat-a board of director zingah a tel a ni.

Kum 2011 khan Simbhaoli Sugars Limited hi loan cheng vaibelchhe 150 pek a ni a, hei hi Reserve Bank of India (RBI) scheme hnuaia fu chingtu mi 5,700-te tana tih a ni. He loan hi fu chingtute tan kum 2012 January–March thla khan pekchhuah ni mah se, a dawngtu turte kut hi a thleng lo a ni. CBI official-te chuan company account-ah company tana hman turin heng pawisate hi pawhpen a ni tih an sawi. Kum 2015 March thla khan he account hi non-performing asset (NPA)-a puan a ni.

Mahse NPA-a puan a nih hmain bank chuan a loan lak hmasak rulhna turin bank dangte nena ruahmanna an siam hnuiaah sugar company hi loan dang cheng vaibelchhe 110 a pe leh a, mahse hei pawh hi kum 2016, November thla khan NPA a puan a ni leh bawk.

Nikum November thla khan Oriental Bank of Commerce chuan Simbhaoli Sugars Limited lakah complaint a lo thehlut tawh a, CBI hian kar kalta khan FIR hi a ziaklut chauh a ni. FIR ziahluh a nih hnu hian company kaihhnawih hmun pariatte chu dap an ni tawh a ni.