CBI-in PNB staff chhuichiang dawn

Central Bureau of Investigation (CBI) chuan Punjab National Bank-a dik lo taka lunghlua sumdawng, Nirav Modi leh Mehul Choksi-te hnena loan cheng vaibelchhe 11,400 pek a nih chungchang chhuina kalzelah bank official-te an chhui chiang dawn.

PNB chuan an bank-a thil dik lo thleng chungchang hi January 29-ah a complaint a, mahse complaint a thehluh hma hian Modi leh Choski-te bakah an chhungte chu ram pawn lamah an tlanchhe hman a ni. CBI chuan bank official zingah Modi leh Choksi-te thil awmdan lo hriattir lawk an awm thei nia sawiin, an tlanchhuah pawh hi a hma aṭanga ruahman lawk vek niin a sawi.

Agency senior official chuan Nirav Modi leh Mehul Choksi hian India ram an chhuahsan hmain an sulhnute pawh an thup fel vek hman niin a sawi a, Interpol member ram hrang hrang hnenah Diffusion Notice thawn a ni chuan an awmna chin hi chhui theih a la ni lo, a ti. Modi leh Choksi bakah an chhungte hian January 4–6 inkar khan India ram an chhuahsan vek a ni.

Hetihlai hian PNB-a sum tihchingpen a nih dan chhuitu dang, Enforcement Directorate (ED) chuan ram hrang hrang hnenah Letters Rogatory (judicial requests) thawn a tum a, heng zingah hian Belgium, Hongkong, US, UK, Dubai, Singapore, Switzerland leh South Africa pawh an tel. Heng ram hrang hrang hnenah hian an rama Nivar Modi-a sumdawnna leh thil neih te bakah, Choksi-a enkawl Gitanjali Group thil neihte an zawtchiang dawn a ni.