SKorea president hlui makpa in dap

South Korean prosecutor-te chuan nimin khan an ram president hlui Lee Myung-bak-a makpa, Lee Sang-joo in chu thamna laa puh a nih kaihhnawihah an dap.

Lee Sang-joo hi President hlui Lee-a fanu upa ber pasal niin, Samsung Electronics-ah senior executive a ni. Lee hi president hlui tan hian midang hnen aṭanga thamna lo dawnsakah puh a ni a, nimin khan Seoul Central District Prosecutors' Office-a investigator-te chuan a office leh chenna in an dap a ni.

President hlui Lee hi a company nia sawi, auto parts manufacturer DAS a eirukna thleng kaihhnawihah chhui mek a ni. Pathianni khan a fapa, DAS executive Lee Si-hyung chu prosecutor-ten thu an lo zawtfiah tawh bawk a ni. President hlui hi thla thar tir lamah thu zawhfiah tum a ni bawk.