Delhi official-ten inbiak rawtna hnawl : CM leh deputy CM chunga action lak phut

Delhi bureaucrat-te chuan Delhi-a rorellai Aam Aadmi Party (AAP) MLA ṭhenkhatin chief secretary Anshu Prakash kut an thlak nia sawi chungchanga AAP sorkarin an inkar buaina chinfel a nih theih nana inbiak a rawt chu an hnawl.

Official-te chuan chief secretary hi Chief Minister leh deputy chief minister awm lai ngeia kut thlak a nih avangin CM leh deputy CM lakah action lak an phut thu an sawi. Joint Forum of the Delhi Government Employees chuan Chief Minister Arvind Kejirwal-a hnen aṭangin ziak ngeia thupha chawina tihchhuah a nih loh chuan an lungawi dawn lo tih an sawi.

Chief secretary kutthlak a nih avanga Delhi sorkar leh official-te inkara kar khat zet inhriatthiam lohna awm tawh hi chinfel dan zawng a, inbiakna neih dan tur ngaihtuah turin Delhi sorkar chuan minister Rajendra Pal Gautam chu a ruat a ni.

Joint Forum of the Delhi Government Employees chuan sorkar official-te chuan CM Kejirwal leh a cabinet-te meeting chu an la boycott chhunzawm zel a ni. Hetihlai hian Delhi Assemby budget session neih hun tur chungchang tihfel a ngaih avangin nimin khan sorkar chuan meeting a ko a, chief secretary Anshu Prakash chuan CM hnenah ṭawngkam mawi lo taka ankhum leh kutthlak an ni dawn lo tih a intiam ngam chuan meeting hi an tel tur thu a hrilh.

CM hnenah lehkha a thawnah, Prakash chuan Delhi sorkar hnuaia hnathawkte chuan sorkar chuan tluang taka hna a thawh zel an duh vek tih sawiin, budget session neih hun tur tihfel a hun tawh avangin amah leh officer dangte pawhin he thil hi an ngai pawimawh niin a sawi. Mahse beih an tawk lo ang tia CM-in a tiam phawt an phut a ni.