CBI-in firm executive 10 zawng mek

Central Bureau of Investigation (CBI) chuan Thawhṭanni khan Punjab National Bank (PNB)-a cheng vaibelchhe 11,400 chuang tihchingpen chungchanga mawhphurtua puh, Nirav Modi leh Mehul Choksi nena inzawmna nei firm-a executive 10 dang man tumin a zawng leh mek.

CBI hian Punjab National Bank (PNB) Executive Director KV Brahmaji Rao, General Manager pahnih leh official pension tawh pakhat chu sum tihchingpen kaihhnawihah hian thu a lo zawtfiah tawh a ni.

CBI team chuan Thawhṭanni khan Roa hi a ni thumna atan thu an zawtfiah leh a ni. Pathianni pawh khan darkar riat chuang thu an zawt tawh bawk a, Inrinni khan PNB Managing Director-cum-CEO Sunil Mehta chu thu zawh a ni tawh bawk.

Income Tax Department chuan Mehul Choksi-a group, Gitanjali Group bank account 66, cheng viabelchhe 80.07 hu chu khawih chet theih lohin a lo hreksak tawh a ni. Hei bakah hian Modi leh Choksi-te pawh Ministry of External Affairs-in hriattirna a pek an chhan duh loh avangin an passport pawh a tihtawp sak bawk a ni.

Modi leh Choksi-te hian kumin kumtir lam khan India an chhuahsan a, tun thlengin an awmna tak hriat chian a la ni lo. ED chuan Nirav Modi leh a company thil neih 21, cheng vaibelchhe 523.72 hu chu khawih chet theih lohin a dahsak tawh bawk.