TRAI-in Aircel hnenah hriattirna pe dawn

Telecom regulator TRAI chuan leiba ngah avanga buai mek, mobile network operator Aircel hnenah an service tiṭha tura hriattirna a pe dawn a, hei bakah hian network danga insawn duh Aricel customer-te tana porting code pekchhuah hun pawh pawhsei sak a tum bawk.

Aircel company chuan kar hmasa khan sum lama harsatna lian tak an tawh thu hi TRAI hi an lo hriattir tawh a, company hian sum lamah a tlachhia, bankrupt tih a thehlut dawn nia sawi a nih vangin subscriber, distributor leh retailer bakah an partner thlengin an chiai hman hle a ni.

Aricel chuan TRAI hnenah hian an subscriber-te, network danga an mobile number ngai hmanga an insawn theihna tura port out code pekchhuah theih hun chu pawhsei sak turin a ngen a ni. Hei vang hian TRAI chuan subsriber-te harsatna sutkian sak nan, Aircel hnenah hian port out code pekchhuah theih hun, dan pangngaia ni 15 pek ṭhin chu ni 45-ah tihseisak a tum a ni.

Malaysia Maxis company ta, Aircel hian leiba cheng vaibelchhe 15,500 vel a nei a, promotor-ten sum an pekte an tihtawp avangin harsatna hi a tawk mek a ni. An buaina chinfel ngaihna a awm tawh lo nia sawi a nih vangin company hian National Company Law Tribunal (NCLT)-ah sum lama a tlakchhiat thu thehluh a tum nia sawi a ni a, hemi rual hian company hian a thil neihte hi hralh dan a zawng mek nia sawi a ni bawk a, heng zingah hian customer maktaduai 80 chuang leh infrastructure pawh a tel. Aircel leichhawn tum nia sawi zingah hian Bharti Airtel pawh sawilan a ni. Airtel hian km 2016 khan Aricel 4G spectrum chu cheng vaibelchhe 3,500 in a lo leisak tawh a ni.