Covid-19 kai thar 34,000 awm belh leh

India ramah nitin hri kai thar pun belh leh ṭhin mah se ni sarih chhunga hri kai chawhrual, seven-day average erawh an tlahiam thung a ni.

Ningani khan ram pumah hri kai thar 36,599 leh hri vanga thi 543 an awm. August 5 aṭang khan karkhat chhunga hri kai zat chawhrual hi an tlahniam tawh a, ni sarih liam ta chhunga hri kai zat chawhrual chu 34,445 an ni. Hei bakah hian ni sarih liamta chhung khan hri kai thar hian 40,000 an pel lo bawk.

Hri kai mek, active case pawh 3,63,605-ah tla thlain, ni 150 hnua a hniam ber ṭum a ni. Hri kai mek hi hri kai hmuhchhuah tawh aṭanga 1.12% an ni mek a ni.

A&N Islands, Gujarat, Haryana, Uttarakhand, Madhya Pradesh leh Puducherry tih lohah chuan hri kai an tlahniam a, Ningani khan state leh UT dang zawngah chuan hri kai thar zat hi kar liamta ai khan an tlem zawk vek a ni.

Maharashtra-ah kar liamta Ningani aiin tunkar Ningani khan hri kai thar hi 1,163 in an tlem zawk a ni. Karnataka-ah 425, Andhra Pradesh-ah 358 leh Kerala-ah 329 in an tlahniam bawk

Kerala-ah hri kai thar tam berin, mi 21,116 an awm. Hri vanga thi 197 awm belh lehin, state zingah hri vanga thi tam berna a ni. Maharashtra-ah hri vanga thi 154 an awm belh bawk a ni. Odisha-ah 68, Tamil Nadu-ah 29, Karnataka-ah mi 27 hri kaihhawih vanga thi an awm a ni.