August 21 aṭangin zan lamah Taj Mahal tlawh phal dawn

Hripui leng vanga kum khat chuang zet zan lama tlawh theih loha khar a nih hnuah, August 21 aṭangin Taj Mahal hi zan lamah tlawh phal a ni tawh dawn.

Nikum March 17-a hri leng vanga ram puma lockdown puan a nih hmasak ber aṭang khan Taj Mahal-a zan lama tlawh khap a ni.

ASI superintending archaeologist (Agra Circle) Vasant Kumar Swarnkar chuan August 21, 23, leh 24-ah Taj Mahal night viewing hi phal a ni dawn tih a sawi. Zirtawpniah dan pangaiin khar chhunzawm tur a ni a, lockdown vangin Pathianni-ah pawh khar a ni ang, a ti.

Zan lama tlawh theih hun hi hunbi pathum, 8:30-9 pm, 9-9:30 pm leh 9:30-10 pm inkarah ṭhen a ni. Hun bi khat chhung Supreme Court kaihhruaina siam angin mi 50 zel luh phal a ni ang. Ticket hi chhun lamah ASI office counter-ah book lawk theih a ni ang.

Tourism Guild of Agra vice-president Rajeev Saxena chuan hma an sawn zel chu lawmawm a tih thu a sawi a, hemi rual hian Pathiannia lockdown puan leh zan dar 10 china curfew puan chu hlih fel a nih hma chuan khualzin tam zawk hip luh chu a la har dawn tih a sawi.