Assam sorkarin 'foreign' detention centre 'transit camp' tiin a thlak

Assam sorkar chuan ram dang mi leh dan loa pem lut mante dahna, detention centre tia vuah chu 'transit camp' tiin a hming a thlak.

Home and political department-a principal secretary, Niraj Verma chuan hriattirna tichhuakin, detention centre hming thlak a nih thu hi a sawi a ni. Official chuan a hming thlak a ni ringawt tih sawiin, thil dang tihdanglam a awm lo tih a sawi. Detention centre tih chuan inenkawlna kalpui danah in ang lo hle mah se, concentration camp tih a ang a, hei vang hian hriat nuam zawk turin a hming hi thlak a nih thu a sawi.

Assam-ah hian detention centre hi paruk - Diburgarh, Kokrajhar, Goalpara, Jorhat, Tezpur leh Silchar jail-ahte a awm mek a ni. Goalpara district-a Mation-ah mi 3,000 awm theihna tur siam mek a ni bawk.

Foreigner's tribual-in foreigner tia a puan leh, dan loa Assam-a pem luta puhte chu heng hmunah hian dah an ni. Centre-a awm zinga a tam zawk chu Bangladesh aṭanga lut an ni. Mahse heng mite thawn kir tur hian India leh Bangladesh hian repatriation treaty an siam loh avangin, eng chen nge centre-ah hian hren an nih dawn leh, eng kawngin nge thawn kir an nih dawn sawichian theih a la ni lo.

Kum 2019-a Supreme Court-in thupek a lo tihchhuah tawh angin, detention centre-a kum thum aia rei awm tawh mi 273-te bail-a chhuah tir an ni tawh a, mi dang 481 chu nakkumah chhuahtir an ni leh ang.