Covid-19 kai thar 30,948 awm belh leh : Zirtawpni aiin hri kai thar 10% in an tlem

India ramah Inrinni khan Covid-19 kai thar 30,948 an awm belh leh a, Zirtawpni aiin hri kai hi 10.18% in an tlem zawk. Inrinni khan hri vanga thi 403 an awm belh tih Union Health Ministry chuan a tarlang.

Ni 27 chhung a zawnin nitin hri kai zat, daily positivity rate chu 3% hnuailamah a tlathla tawh a ni.

Kerala chu hri kai thar tamna ber ni zelin, Inrinni-ah hri kai thar 17,106 an awm. Rampuma hri kai thar zat aṭanga 50% chuang an awm. Hri leng tuar na ber Maharashtra chuan hri kai thar 4,575 leh hri vanga thi 145 an neih belh leh bawk.

Covid-19 vaccine vaibelchhe 58 chuang semchhuah a ni tawh a, Inrinni khan dose nuai 44 semchhuah leh a ni.

Nitina hri kai thar hi ni 27 chhung chu 3% hnuai lamah a awm tawh a, Inrinni thleng khan 1.95% a ni mek. Hri kai hmuhchhuah tawh aṭangin hri kai mek, active case chu 1.09% an ni a, March 2020 hnua a hniam ber ṭum a ni. Covid-19 kai dama puan, recovery rate chu 97.57% a ni tih Union Health Ministry chuan a sawi.

Delhi-ah Inrinni khan Covid-19 vanga thi an awm lo a, mahse hri kai thar 19 an awm thung. Hri kai mek zat, positivity rate chu 0.08% a ni tih health ministry data chuan a tarlang. Hri leng thawh hnihna hnuah India khawpuiah ni khat chhunga hri vanga thi an awm loh ṭum 12-na a ni.

Zydus Cadila siam Covid vaccine ZyCoV-D chuan Zirtawpni khan puitling leh naupang kum 12 chunglam tana hman phalna an hmu a, October thla hnu lamah chuan thlatin vaccine dose vaibelchhe khat semchhuah ziah an beisei tih an sawi. Zydus Cadila hian kumin December-nakkum January inkarah dose vaibelchhe 3-5 inkar siamchhuah an tum a, sorkar laipui hnena an intiamna August-December chhunga vaccine dose vaibelchhe 5 semchhuah an tumna chu an pha dawn lo tih an sawi bawk.

Covishield, Covaxin leh Sputnik V vaccine-te chu kum 18 chunglam tan pekchhuah mek a ni a, ZyCoV-D erawh dose thuma lak chi a ni thung. Ramchhungah vaccine dose bikima la tawh zinga mi 87,000-te chuan Covid hri an kai tih hriat a ni bawk. An zinga 46% vel chu Kerela state ami an ni.

Khawvel pumah coronavirus kai maktaduai 200 chuang an awm tawh. Khawvel ram hmun thuma ṭhena hmun khatah hri kai an pung thar leh a, heng zinga ram tam zawkah chuan vaccine dose khatna la hi 50% pawh an la tling lo.