Tamil Nadu LS seat hloh chungchang ngaihtuah ṭha turin phut

Madras High Court chuan Tamil Nadu chuan state chhunga population control hlawhtling taka a kalpui hnuah kum 1962 aṭang khan Lok Sabha-a seat pek a nih dan chu a dik lo a ni, a ti.

Court chuan sorkar laipui hnenah Tamil Nadu leh Andhra Pradesh state-te seat chanpual tihtlem sak an nih chu a hma anga pek leh emaw, a nih loh chuan zangnadawmnaa emaw pek dan ngaihtuah turin a ti. Tamil Nadu tan hian zangnadawmna, cheng vaibelchhe 5,600 a phut a ni.

Justice N Kirubakran leh B Pugalendhi awmna bench chuan, State pahnihte hian population control hlawhtling tak an kalpui hnuah Lok Sabha-ah seat hnih ve ve an chan phah a ni, a ti. Hetih laia population control hlawhtling ve lo ten Parliament-a state aiawh tam zawk an nei thei chu an hriatthiam loh thu an sawi.

Kum 1962 thleng khan Tamil Nadu hian Lok Sabha-ah member 41 a nei a, mahse mihring pung chak tur venna hlawhtling taka a kalpui hnuah, kum 1967 inthlanpuiah khan an state seat neih zat hi 39-ah a tlahniam a ni.

Bench chuan, "MP term khat, kum nga chhunga a thawh hi cheng vaibelchhe 200 hu anga chhutin, Tamil Nadu hian a aiawh pahniha a titlem sak a nih avangin term khatah zangnamdawna Rs vbc 400 zel pek a ni tur a ni. Hetiang a nih chuan ṭum 14 inthlanpui neih tawhah seat hnih zel hi hlohin, a vaiin seat 28 ang a ni a, zangnadawmna a dawn tur hi a vaiin Rs vbc 5,600 a tling a ni," a ti. Hemi chungchang hi kar li hnuah ngaihtuah leh a ni ang.