CBI-in FEMA bawhchhiat vangin Karti Chidambaram man

Central Bureau of Investigation (CBI) chuan nimin khan Congress party hruaitu hlun leh union finance minister hlui P.Chidambaram-a fapa, Karti Chidambaram chu Foreign Exchange Management Act (FEMA) bawhchhiaa puhin Chennai-ah an man.

Karti Chidambaram hi United Kingdom

aṭanga a rawn haw, Chennai Airport-ah CBI hian an lo man a ni. Kar hmasa khan rampawn lama zinchhuah phalna hi Madras High Court-ah a lo dil tawh a, Airport chhungah hian thu zawhfiah nghal niin, nimin vek khan Delhi-ah hruai a ni.

CBI chuan kum 2007, P Chidambaram-a finance minister a nih lai khan Karti Chidambaram hian a pa nihna hi hmang ṭangkaiin, inzawmna a neihpui firm INX Media-a cheng vaibelchhe 305 investment tihna turin Foreign Investment Promotion Board (FIPB) approval a hmuh phah niin a sawi. Karti, INX Media bakah midang pariat leh finance ministry official ṭhenkhat lakah FIR ziahluh a ni.

Finance ministry chuan kum 2007, March 15 han INX media aṭangin FIPB approval dilna a dawng a, hemi kum vek May 18-ah FIPB chuan meeting-ah INX media rawtna hi a recommend a ni. Mahse board chuan INX media-in INX news-a downstream investment a tih chu a pawmpui lo a, INX media tan hian FDI inflow pawh cheng vaibelchhe 4.62 chiah a phalsak a ni. CBI-in FIR a thehluhah, FIPB in phalna a pek chin hi palzutin, INX media hian INX news-ah downstream investment chu capital aṭanga 26% thleng a ti a ni. INX media hian foreign investor-te hnenah share pe chhuakin, FDI inflow phalzat chin Rs vbch 4.62 a nih laiin Rs vbch 305 chuang an siam nia sawi a ni. Enforcement Directorate-in CBI hnenah INX media-ten dik lo taka sum an pek dan hi a hriattir hnuah CBI chuan thubuai hi an ziaklut ta a ni.

CBI chuan media firm hnen aṭanga sum dawnga puh a nih chungchangah Karti Chidambaram-a in leh office, khawpui pali amite chu an lo dap tawh bawk. Karti hian a pa nihna chu chhawr ṭangkaiin, INX Media-in FIPB approval a hmuh theihna turin a pui a, an hnen aṭang pawhin sum ṭhahnem tak a dawng nia puh a ni. Mahse Karti chuan an puhna zawng zawngte hi thu dik lo niin a sawi thung.