Bihar CM hluiin NDA chhuahsan

Bihar chief minister hlui leh Hindustani Awam Morcha (HAM) hotu Jitan Ram Manjhi chuan nimin khan an state-a rorellai, NDA chhuahsanin eptu pawl, RJD kaihhruai grand alliance a zawm.

Kum 73 mi, Dalit hruaitu Manjhi hian RJD hotu Lalu Pradas Yadav-a fapate pahnih–Bihar eptu hruaitu Tejaswi Yadav leh health minister hlui Taj Pratap Yadav-te nena darkar khat chuang meeting an neih hnuah, a thutlukna hi chanchin thar lakhawmtute hmaah a puang a ni. Thawhlehni khan Yadav-a thawhpui hnai tak leh MLC Bhola Yadav chuan Manjhi hi grand alliance zawm tur hian a lo sawm tawh a ni.

Tejaswi leh Tej Pratap-te nen meeting an neih hnuah, thultukna siamin NDA hi a bansan a, grand alliance a zawm ta tih Manjhi chuan a sawi.

Bihar-a rorellai NDA-a hian JD(U), BJP, RLSP leh LJP an tel a ni. BJP hruiatu leh road construction minister Nand Kishore Yadav chuan NDA chhungah buaina a awm lo tih sawiin, Manjhi pawh hi biak leh an tum tih a sawi. Prime Minister Narendra Modi leh BJP national president Amti Shah-te pawhin Manjhi hi NDA-a tel chhunzawm zel tura sawmin phone-in an bia nia sawi a ni bawk.

HAM national president leh Bihar-a an party MLA awmchhun, Manjhi hi tunhnaiah BJP leh JD(U) hruaitute chungah an lungawi lo hle nia sawi a ni. Jehanabad assembly seat-a by-election neih tura NDA ticket-a din a duhna pawh hnawlsak a ni a, governor-a dah tura beiseina a neih pawh BJP hian a lo hnawlsak tawh bawk.

Manjhi hi kum 2014, May 20–2015, February 20 inkar khan Bihar CM a ni.