Congress hruaitu Kharge-a'n PM sawmna hnar

Congress Party hruaitu hlun Mallikarjun Kharge chuan Prime Minister Narendra Modi-an Lokpal ruat leh thlanna tur meeting a kohah 'special invitee' anga tel tura a sawmna chu a hnar.

Prime Minister hnena lehkha a thawnah, Lok Sabha-a Congress hruaitu Kharge chuan eirukna dotu tur, Lokpal thlanna tur chu eptu pawl lamte ban an tumna tura hmalakna a ni tiin, meeting-ah hian a tel dawn loh thu a sawi.

Kharge chuan, "Special invitee anga insawm hi ramchhunga anti-corruption watchdog pawimawh ber tur thlanna kawnga eptu lamin aw an neih ve theih lohna tura tih a ni", a ti. An sawm dan chuan lokpal and lokayuktas act, 2013 a bawhchhia niin a sawi. Congress hruaitu chuan Narendra Modi-a kaihhruai NDA sorkar chuan eng vanga nge kum li chhung zet Lokpal ruat tur a tihkhawtlai chhan a zawt bawk.

PM lehkha a thawnah hian Kharge chuan Congress kaihhruai UPA sorkar lai khan Lokpal Act, 2013 hi pass a ni tawh a, kum 2014, January 16 aṭang khan hman ṭan a ni, a ti. Mahse BJP sorkar chuan eirukna a do thu vawi tak tam sawi mah se, eirukna dotu tur Lokpal hi kum li dawn a ruat duh lo a ni, a ti.

Lokpal ruat tura high-power meeting neih turah hian Prime Minister bakah Chief Justice of India Dipak Misra leh Lok Sabha Speaker Sumitra Mahajan-te an tel ang.

Congress president Rahul Gandhi chuan Congress sorkarin Lokpal Act a siam aṭanga kum li dawn hnuah pawh Modi-a kaihhruai sorkarin a la kalpui lo chu a lo sawisel tawh bawk a ni.

Kum 2017, April thla khan Supreme Court chuan sorkar laipui hnenah Lokpal leh Lokayuktas Act-te chu kalpui tawh tura hriattirin, Lokpal pawh ruat turin a lo hriattir tawh a ni.