Indian sizing standard hran siam dawn

India ram chhunga thawmhnaw size tehna atan Europe ramte leh US ram size code-te hman a ni ṭhin a, mahse kum 2021-ah chuan Indian sizing standard hran neih tum a ni .

Textile ministry hmalaknain, India mite pianphung mila size chart siamna tur hian khawpui lian paruk-a mipa leh hmeichhia, kum 15-65 inkar mi 25,000-te pianphung hrang hrang chu tehin endik a ni ang.

Survey neih tur hi Size India tia vuah a ni a, kum 2021-ah zo felin, National Institute of Fashion Technology chuan a hmang nghal dawn a ni. Survey neihna tura khawpui thlante chu–Kolkata, Mumbai, New Delhi, Hyderabad, Bengaluru leh Shillong a ni a, he survey neihna senso atan hian cheng vaibelchhe 30 ruahman a ni. Survey thawh khatna hi kum 15-56 inkar thawmhnaw size chart siamna tura atan neih a ni dawn a, a thawh hnihna chu naupang leh pheikhawk size siamna atan neih leh a ni ang.