CBI-in P Chidambaram-a thu zawtfiah dawn

Central Bureau of Investigation (CBI) chuan Union Finance minister hlui leh Congress hruaitu, P Chidambaram-a chu a fapa-in thamna sum a la nia puhna kaihhnawihah thu an zawtfiah dawn.

P Chidambaram-a fapa, Karti Chidambaram-a hi INX Media hnena aṭanga thamna sum dawnga puh a nih chungchangah Nilaini khan man a ni tawh a, court-ah hruai a nih hnuin Ningani khan CBI court chuan ni nga chhung hren a phalsak a ni.

Chidambaram hi a fapa a hmuh phalsak niin, Karti hnenah lo lungngai lo tur pawhin a hrilh a ni. Judge chuan Karti hi a damdawi pek chhunzawm leh health check-up a neih pawh a phalsak a, mahse in lam aṭanga ei tur pek a dilna erawh a hnawlsak thung.

CBI chuan Karti-a hian ram pawn lama a zinchhuahnaah thamna a dawnna bank account-te hi a khar vek niin a sawi a, hei bakah hian company hrang hrang nena inzawmna an neih dan finfiahna ṭha tak a awm bawk niin a sawi.

CBI aiawha ding, Additional Solicitor General Tushar Mehta chuan Karti chungchang hi politics lama phuba lakna a ni lo tih sawiin, Constitution Article 21 behchhanin a chungthu hi chhui chian mek a ni, a ti.

Karti hian Mumbai-a hmunpui nei, INX Media, tuna 9X Media tia thlak tak chu kum 2007 khan Foreign Investment Promotion Board (FIPB) clearance an hmuh theihna atan puiin, an hnen aṭang hian thamna cheng vaibelchhe 3.5 a dawng nia sawi a ni. Hetihlai hian INX Media hi Sheena Bora thahna thubuaia man, Peter leh Indrani Mukherjee-ten an enkawl a ni.