Hri leng thawh thumna a hnai : Covid-19 in naupang a nghawng na maithei : Home Ministry panel

Home Ministry panel chuan Prime Minister Office (PMO) hnenah Covid-19 hri leng thawh thumna a hnaih thu leh October thla velah chuan a peak an thlen hman mai theih thu an hrilh.

National Institute of Disaster Management (NIDM) hnuaia committee of expert din hian Covid-19 hri leng thawh thumnaah hian puitling ang bawkin naupangte chu a nghawng dawn tih an sawi.

Expert panel chuan hri leng thleng palh turah ramchhunga nausen enkawlna hmunte chu an bei tham hle tih sawiin, hei vang hian medical infrastructure leh healthcare facility-te thuam ṭha turin PMO hnenah ngenna an siam.

PMO-a report an thehluhah, panel hian ram chhugna medical facility, doctor leh thawktu indaih loh chungchang leh, hmanrua - ventilator leh ambulance tam tawk loh thu an sawilang. Tuna medical facility neihsaah chuan naupang tam zawkin hri kai palh se enkawlna daih khawp an nei zo lo nasa dawn hle a ni, a ti.

Report an tihchhuah "Third Wave Preparedness: Children Vulnerability and Recovery”-ah hian hri leng thawh thumnain naupang a nghawng theih dan te leh hripui an hmachhawn dan turte ziah lan a ni.

Expert panel report chuan naupang zinga natna benvawn nei leh rualbanlote hnena vaccine pekchhuah chu hna hmasaa neih a pawimawh zia a tarlang. He report hian khuahkhirhna uluk taka kan kengkawh chung pawhin Covid-19 thawh thumna chu October thla tawp lamah a peak a thlen a rinawm thu a tarlang bawk.

Covid management team-a member pawimawh tak, Dr VK Paul chuan Covid thawh thumnaah hian naupangin an tuar na bik dawn tih finfiahna engmah a awm loh thu a lo sawi tawh thung. Paul chuan puitlingte chuan an fate him nan vaccine an la ngei tur a ni tiin hri leng thar leh turah hian Covid kai mi 100 zel zinga 23 te chu damdawi-ina dah tur angin inruahman a ngai tih a sawi.

Covid thawh thumna lo thleng thei chungchanga an zawhna chhangin, Union Information and Broadcasting Minister Anurag Thakur chuan sorkar laipui chu theihtawpin a inbuatsaih tih a sawi. Hemi atan hian sorkar laipui chuan cheng vaibelchhe 23,123 an ruahman tih sawiin, hri leng thawh thumna hian kum naupang lam a nghawng dawn nia an sawi avangin nuasen enkawlna thuamṭhat chu an ngaihpawimawh thu a sawi bawk.