Afghanistan chungchang floor leader-te hrilhfiah turin PM Narendra Modi-a'n MEA a hriattir
External affairs minister S Jaishankar chuan prime minister Narendra Modi chuan Ministry of External Affairs (MEA) hnenah political party floor leader-te hnenah Afghanistan chungchanga sorkar hma lak dan chu hrilhfiah turin a hrilh tih a sawi.
Afghanistan ram buaina thleng mek leh, sorkarin mission a kalpui chungchang hrilhfiah tur hian sorkar laipui chuan August 26-ah Parliament floor leader-te chu all party meeting nei turin a sawm. Parliament House Annexe-a Main Committee Room-ah chawhma dar 11-ah meeting hi neih a ni ang.
Minister of parliamentary affairs Pralhad Joshi chuan PM-in ngenna a siam hnuah all party meeting atana sawmna hi a tichhuak a, sawmna an pek chhuah party hruaitute chu tel ngei turin a ngen.
Sorkar laipui chuan Aghanistan-a Taliban firfiakten thuneihna an chan hnua India mite hruai chhuahna tura hma a lak dante a sawi chiang dawn a ni. India mite bakah Afghan Sikh leh Hindu-te pawh hruai chhuakin, mi 700 chuang India ramah hruai kir an ni tawh.
NATO leh American aircraft hmanga Kabul aṭanga Qatar khawpui, Doha-a hruai chhuah zinga India mi 146-te chu nimin khan India-ah hruai kir an ni leh bawk. Pathiannia hruai mi 392 zingah Afghan lawmaker pahnih an tel bawk a ni.
August 17 khan Afghanisan aṭanga India mite him taka hruia haw an nih theih dan tur ngaihtuahin PM Modi hoin Cabinet Committee on Security chuan meeting an lo nei tawh a, India mite chu an vaiin him taka hruai kir vek an ni dawn tih an sawi.