Railway-in hri leng vangin Rs vbc 36,000 hloh : Union Minister

Union minister Raosaheb Danve chuan Pathianni khan Railways-in coronavirus hripui len chhungin cheng vaibelchhia 36,000 an hloh hman tih sawiin, rampawna bungrua phurtu rel te chu an sum lakluhna hnar pawimawh ber an nih thu a sawi.

Minister of State for Railways chuan he thu hi Jalna railway station-a underbridge dinna tura lungphum a hawnna hmunah a sawi a ni.

"Mipui phurtu relte hi chu hlawkna tel tur awm lo chungin an tlan ṭhin. Ticket man kan tihsan hian passenger lamah harsatna a awm ṭhin avangin kan tisang ngam lo a ni. Hripui len chhung hian Railway chuan Rs vaibelchhe 36,000 an hloh a ni" a ti.

"Bungrua phurtu relte hi hlawkna kan hmuhna a ni. Hripui len chhung khan heng relte hian bungrua phur kualin mipuite mamawh an pe a, hna pawimawh tak an thawk a ni," tiin minister chuan a sawi.

Bullet train chungchang pawh sawi chhuakin, he project hi mipui mamawhna vangin Mumbai-Nagpur Expressway inkarah tlantir an ni dawn tih a sawi bawk.

Railways chuan Navi Mumbai leh Delhi inkalpawhna tur, Western Dedicated Freight Corridor project chu a thawk mek a ni, a ti. Nanded leh Manmad station inkara kawngte chu tihlen a ni dawn a, Jalna-Khamgaon railway line chu a inkalpawh theih dawn leh dawn loh a enfiah tur thu a sawi.