Thu zawhfiah turin Mumbai-ah Karti hruai

INX Media aṭanga thamna dawnga puha man, Congress hruaitu P Chidambaram-a fapa, Karti Chidambaram-a chu nimin khan thu zawhfiah turin Mumbai-ah hruai a ni.

Karti hi March 1 khan New Delhi-a Patiala House Court chuan CBI kuta ni nga awm turin a lo rel tawh a, nimin khan Air India thlawhtheihnain zing dar 8-ah Mumbai panpui a nih thu CBI official chuan a sawi.

Mumbai-a inkhuar, INX Media, tuna 9X Media tia thlak tawh, hnen aṭangin Karti hian kum 2007 khan Foreign Investment Promotion Board (FIPB) clearance a hmuhna tura a puih vangin thamna cheng vaibelchhe 3.5 a dawng nia puh a ni. He thil thlen lai hi a pa, P Chidambaram-a finance minister a nih lai a ni a, a pa nihna hi dik lo takin alo hmang nia puh a ni.

Karti Chidambaram-a hnenah thamna an pe nia sawi lai hian INX Media hi Sheena Bora tualthah thubuaia man tak, Peter leh Indrani Mukherjea-ten an enkawl lai a ni. Indrani Mukherjea-i hian magistrate hnenah hian Delhi hotel-ah Karti nen hian inhmuin, FIPB clearance a hmuhsakna atan thamna, dollar maktaduai khat pek a phut niin a sawi. Peter leh Indrani Mukherjea-te hi Mumbai jail-ah an tang mek a, CBI hian an pathum hian thu an zawt ho dawn a ni.