President leh VP motor-in number plate nei dawn

India ram hotu, President, Vice President, Governor leh Lieutenant Governor-te motor chuan registration number an nei thuai dawn.

Ministry of Road Transport and Highway chuan Delhi High Court-a affidavit a thehluhah, heng hruaitute motor hian register number nei se an duh thu a sawi a ni. Hei hi Acting Chief Justice Gital Mittal leh Justice C Hari Shankar awmna bench chuan a ngaihtuah a ni.

Affidavit thehluhah hian,President/President's Secretariat, Vice President/Vice President's Secretariat, Governor/ Lieutenant Governors/ leh an officers/secretariat, Ministry of External Affairs-te motor hman chu register vek an phut thu a sawi a, hei hi tih a nih loh chuan an registration mark chu dan ang takin an tilang tur a ni, a ti. MEA hian motor 14 neiin, hei hi ramdang palaiten an rawn tlawhin hman ṭhin a ni a, MEA chuan heng motor-te registration hi a buaipui mek niin a sawi bawk.

Petition thehluttu, NGO Nyayabhoomi chuan heng ram hotute motor-a registration number aia state emblem, sakeibaknei pali lem chuanna dah lan a ni zawk ṭhin chu sorkar hotu leh palai pawimawhte misual leh firfiak tan bitum awlsam takah a dah phah zawk niin a sawi a ni. Hei bakah he thil hian midangte rawngbawl saktu nih aiin roreltu nih chakna a lantir niin a sawi bawk.