PNB official-in Modi hnen aṭangin thamna a dawng

Punjab National Bank (PNB) a sum tam tak, cheng vaibelchhe tam tak hu inbumna thleng chungchang chu Central Bureau of Investigation (CBI) chuan a chhui zui zel a, Inrinni khan court hnenah PNB official pakhat chuan he inbumna thlenga mawhphurtu bera puh, billionaire jeweller Nirav Modi-a hnena aṭangin thamna a dawng niin a hrilh.

PNB-a sum tam tak inbumna thleng chungchang hi January thla khan sawichhuah niin, sumdawng hausa Nirav Modi leh a pu, Mehul Choksi-te chu ramdanga Indian bank awmte aṭanga an company-in loan an lak theihna turin PNB aṭang hian dik lo takin letters of undertakings (LoU) an la nia puh a ni. He buaina kaihhnawihah hian CBI chuan mi 14 a man tawh a, hetihlai hian a mawhphurtu ber Nirav Modi leh Mehul Choksi-te erawh chuan India ram an chhuahsan a, an awmna chin hriat chian a ni lo.

CBI chuan Inrinni khan court hnenah, Modi hian PNB aṭanga LoU dik lo taka a hmuh theih nan hian official pakhat chu thamna a pe ngei niin a sawi. He thamna dawngtu nia puh, Yashwant Joshi hi Mumbai branch-a forex department-ah manager a ni a, bank-a inbumna thlengah hian a bultumtu zingah puh niin, Modi-a hnen aṭang hian gold coin gram 60-a rit pahnih leh gold leh diamond bengbeh a dawng nia sawi a ni.