DRI-in Nirav Modi leh a firm-te thubuai siamsak

Pathianni khan Directorate of Revenue Intelligence (DRI) chuan Punjab National Bank-a sum tam tham tak inbumna thleng chungchangah lunghlua sumdawng lian Nirav Modi leh a firm pathumte chu thubuai a siamsak.

DRI hian Central Board of Excise and Customs (CBEC) guideline zulzuiin Nirav leh a firm-te hi chhiah awlruk chungchangah thubuai a siamsak a ni. Hetih lai hian Modi hi ram pawn lamah a tlanchhe tawh a, a awmna chin tak hriatchian a ni lo.

Nirav Modi hi lunghlu leh pearl lakluh chungchangah a hlutna leh a lakluh zatte dik lo taka thehlutah puhin a chungthu ngaihtuah a ni dawn a, hei bakah hian ramchhunga zawrh tura tih lughlute a nihna tur ni loa pawtpengah puh a ni bawk. Customs hnenah document dik lo thehluta puh a nih chungchangah thu zawhfiah a ni dawn bawk a ni.

Modi-a leh a firm pathum–Firestar Diamond International, Firestar International Private Limited, leh Radhashir Jewellery Company Limited-te hi Indian Penal Code (IPC), 1860-a Section 132, 135(1)(a), 135(1)(b), 135(1)(i) of Customs Act, 1962 leh Section 120-B hnuaiah thubuai siamsak an ni. Thiam loh chantir a nih chuan Modi hi kum sarih thleng lung-in tantir theih a ni ang. He thubuai hi ngaihtuah thuai tura beisei a ni bawk.

Mumbai-a special court chuan kar kalta Inrinni khan Nirav Modi leh a pu Mehul Choksi-te lakah hian PNB-a cheng vaibelchhe 12,700 inbumna thleng chungchangah non-bailable warrant (NBW) a lo tichhuak tawh a ni. He court hi PNB buaina chungchang chhuitu zinga mi, Enforcement Directorate (ED) in dilna a thehluh hnuah Prevention of Money Laundering Act (PMLA) hnuaiah din a ni.

Special court hian ED in a dil angin PNB buaina kaihhnawihah hian ram pasarih–Malaysia, Armenia, France, China, Japan, Russia leh Belgium-a Letters of Rogatory (LR) pek a remtih sak bawk. ED hian Modi leh Choksi-te hi agency hmaa inlan turin a lo ko tawh a ni. Mahse an pahnih hian ram pawn lamah an tlanchhe mek a, ED hmaah pawh a inlan lo a ni.

CBI pawhin PNB buaina hi a chhui mek bawk a, thil dik lo tihnaa inhnamhnawiha puh firm official leh PNB Mumbai Brady House branch-a thawk eng emaw zat a man tawh a ni.

PNB buaina hi kum 2011 aṭanga inṭan a ni a, Modi-a hian he bank aṭang hian dik lo takin letters of undertaking (LoU) lachhuakin, hei hi ram pawn lama Indian bank-te hnen aṭanga loan lak nan a hmang a ni. Kumin January chawlhkar thumnaah khan he thil thleng hi hriatchhuah leh puanzar chauh a ni.