West Bengal-ah Rohingya 40,000 khawsak tum

Myanmar rama sipaiten beihpui an thlak avangin Rohingya Muslim nuai tel chu hmun dangah an tlanchhe mek a, heng zinga mi 40,000 vel chu West Bengal-ah inbenbel an tum mek nia sawi a ni.

Ministry of Home Affairs (MHA) hnena report thehluhah, Myanmar aṭanga tlanchhia Rohingya mi 40,000 dawn chu West Bengal-a North 24 Parganas leh South 24 Parganas district-ah an khawsa mek nia sawi a ni. Dan loa Rohingya-te awmna tur buapui chungchangah hian pawl 40 vel an inrawlh mek a, ramchhung hmun hrang hrang aṭangin ṭanpuina tur pawisa te an lakhawm nia sawi a ni bawk.

Heng pawl 40-te hi chhui chian mek an ni a, hmun hrang hrangah a rukin meeting pawh vawi 50 chuang an nei tawh niin report chuan a tarlang bawk. Heng pawlte hian West Bengal-a thingtlang khaw mite chu an ramte Rohingya mite tana pe turte hian an ngen a ni.

Sorkar laipui chuan nikum September thla khan Supreme Court hnenah Rohingya-te hi firfiak pawl nena inzawmna neite an nih avangin ram himna an tiderthawng thei tiin a lo sawi tawh a ni.