Congress-in Nirav Modi humah BJP puh

Congress president Rahul Gandhi leh an party MP-te chuan nimin khan tun hnaia Punjab National Bank (PNB) a sum tam tham taka inbumna thleng an duh lohna an lantir a, he inbumna thlenga mawhphurtu bera puh lunghlua sumdawng lian Nirav Modi chu humah BJP an puh.

Congress party chuan bank-a inbumna lian tak thlenga mawhphurtute chu hrem ngei an phut thu an sawi.

PNB-a hian February 14 khan dik lo taka cheng vaibelchhe 11,400 thawnkual a nih dan hriatchhuah anih thu sawiin, he thil thleng hi chhui chiang turin law enforcement agency-te an ngen an ni. He thiltihnaa mawhphurtua puh Nirav Modi leh Geetanjali Gems promoter Mehul Choksi-te chu chhui mek an ni a, hetihlai hian anni pahnih hi ram pawn lamah an tlanchhia a ni.

Rahul Gandhi hian sorkar laipui chuan Nirav Modi-a a tlanchhiat remtihsakah puhin, he thil thleng chungchanga sorkar hotute an ngawi tlat chu a sawisel a ni. Rahul Gandhi chuan, "Hetianga sum tam tak kaihhnawih buaina thleng hi high-level te humna tel lo chuan a thleng thei lo. A hma hian sorkar lam hian hriat an nei ngei tur a ni a, chutiang ni lo se a thleng thei lo ang", a ti. PNB buaina thleng chungchangah PM chu ṭawngchhuak tura phutin Rahul Gandhi leh party hruaitute chuan Parliament pawnah lungawi lohna hi an lantir a ni.

Hetihlai hian BJP chuan Congress hi chhang letin, PNB-a thil dik lo tak thleng inṭan hun hi Congress kaihhruai UPA sorkar lai a nih thu an sawi thung a, UPA sorkar laia thil dik lo tihte chu BJP hunah a rawn puakchhuak ta niin a sawi.

Nirav Modi hi January thlaa India ram a chhuahsan hnuah a awmna chin tak hi hriatchian a ni lo a, investigative agency-ten an kohna pawh a chhang lo a ni.