SSC exam paper leak vanga nawrh huaihawt chhunzawm zel a ni

Staff Selection Commission (SSC) examination paper leak vanga zirlaiten nawrh an huaihawt chu chhunzawm zel a ni a, Delhi bakah Rajasthan-ah pawh commission lakah lungawi lohna lantir a ni.

Thawhṭanni khan Jaipur-ah zirlai tam tak chu lungawi lohna lantirin an pungkhawm a, darkar hnih hnu velah police-ten an hnawtdarh thei chauh a ni. Bihar khawpui, patna-ah pawh candidate te chuan poster leh banner kengin lungawi lohna an lo lantir tawh bawk.

Delhi-ah chuan SSC paper leak chungchanga lungawi lohna lantira nawrh huaihawt a nih vanga ni hnih chhung JLN Stadium station gate-te khar a nih hnuah nimin khan Delhi Metro Rail Corporation (DMRC) chuan mipuite hman theih turin gate pakhat a hawng leh ta. Delhi Police-te chuan DMRC hnenah hian lungawi lohna lantir a nih vang hian gate-te hi khar turin alo hriattir a ni.

SSC hmunpui awmna, CGO Complex-ah chuan zirlai tam takin lungawi lohna an lantir a, SCC-in February 17-22 chhunga Combined Graduate Level (Tier-II) Examination 2017 a buatsaiha paper pakhat zawhnate a putruk chungchang chu CBI chhuitir an phut a ni.

SSC chairman Ashim Khurana chuan commission hian February 21-a exam tur, Paper I zawhna a putruk chungchang chu Department of Personnel and Training hnenah CBI chhuitir tura rawt a remtih thu a sawi.

Social activist Anna Hazare chuan nawrh huaihawtte hi hmuin, thil dik lo thleng chungchang CBI chhuitir an phutna chu a thlawp thu a hrilh a ni. Delhi BJP hotu leh MP Manoj Tiwari chuan candidate aiawhte hi hmuin, CBI chhuitir tura an phutna pawh an thlawp thu a sawi a ni.