India-ah Covid-19 kai thar 25,467 an awm : Vaccine dose vbc 59 dawn pe chhuak tawh

India ramah Thawhṭanni khan Covid-19 hri kai thar 25,467 an awm belh leh a, hri kai mek 3,19,551 awmin, hri kai hmuhchhuah tawh aṭanga 0.98% an ni a, hei hi May 2020 hnua an tlem ber ṭum a ni tih nimina Union Health Ministry data tihchhuah chuan a tarlang.

Covid-19 kai hmuhchhuah tawh hi mi 3,24,74,773 an tling tawh. Hri vanga thi mi 354 awm belh nen, ram puma hri vanga thi tawh zat chu 4,35,110 an ni.

Hri kai mek, active case chu ni 156 chhunga a hniam ber ṭum niin, ramchhunga Covid-19 kai dama chhuahtir 97.68%-ah a sang chho a, March 2020 hnua a san ber ṭum a nih thu ministry chuan a sawi.

Thawhṭanni khan Covid test 16,47,526 neih leh a ni a, ramchhunga Covid-19 test tawh zat chu 50,93,91,792 a tling tawh.

Nikhata hri kai zat, daily positivity rate chu 1.94% ni mekin, ni 28 chhung chu 3% hnuailamah a tlahniam tawh a ni.

Kartina hri kai zat, weekly positivity rate pawh 1.90% a ni. Ni 60 chhung 3% hnuailamah a awm tawh tih ministry chuan a sawi. Hri kai dama puan tawh mi 3,17,20,112 an awm a, hri vanga thi, case fatality rate chu 1.34% a ni mek.

Ramchhunga Covid-19 vanga thi mi 4,35,110 zinga 1,36,067 chu Maharashtra ami niin, Karnataka-ah 37,155, Tamil Nadu-ah 34,734, Delhi-ah 25,079 , Uttar Pradesh-ah 22,792 , Kerela-ah 19,584 leh West Bengal aṭangin mi 18,731 in an thihpui tawh.

Health Ministry chuan hri vanga thi zinga 70% te chu natna dang neisa an nih thu a tarlang. "Kan chhinchhiahna leh Indian Council of Medical Research chhinchhiah dan hi a inmil chiah a ni" tiin ministry chuan a sawi a, state tina chhinchhiah dan pawh enchian leh a ni dawn tih a sawi.

Ram chhungah Thawhlehni zingkar thleng khan Covid-19 vaccine dose vaibelchhe 58.89 semchhuah a ni tawh bawk.