Maha CM Thackeray ben a duh thu a sawi vangin Union Minister Narayan Rane lakah FIR thehlut

Union minister Narayan Rane chuan Maharashtra chief minister Uddhav Thackeray ben a duh thu a sawi avangin a lakah FIR pathum thehluh a ni.

Pune, Nashik leh Mahad police station-ah complaint thehluh a ni. Nashik cyber police chuan Shiv Sena local chief-in complaint a thehluh behchhanin, FIR an ziak lut a, police commissioner chuan Union Minister manna tur thupek a tichhuak bawk. Minister man tur hian DCP Sanjay Barkund kaihhruai team din a ni.

Pune-a Chaturshringi police station-ah leh Mabad police station-ah IPC section 153 leh 505 hnuaiah Union Minister lakah hian FIR ziah luh a ni bawk.

Rane hian Thawhṭannia Raigad district-a BJP-in Jan Ashirvad Yatra an hmannaa thu a sawiah, Maharashtra chief minister leh Shiv Sena hotu Thackeray chuan kumin August 15-a Independence Day lawmnaa thu a sawiah khan, a kum eng zatna nge tih a theihnghilh a ni, a ti. "Chief minister indepepdence kum eng zatna nge tih a hre lo hi a zahthlak takzet. A thusawi lai hian a kum eng zatna nge tih enchian ngaiin a awm a ni. Khatih hun lai khan lo awm ve ila chuan na takin ka beng ang," a ti.

Maha CM chungchanga Union Minister thusawi hian Shiv Sena te a ti thinur hle. Mumbai khawpui leh hmun dangahte Rane sawiselna poster an tarchhuak nghal a ni. Nimin khan Mumbai-a Narayan Rane chenna in panin Shiv Sena-te hian kawng an zawh a, kawng lakah BJP worker-ten lo dangin an innawr buai a, mahse police-ten an ṭhelh a ni. party pahnih worker-te hi lungin an intawng zui bawk. Nagpur-a BJP office chu Sena woker-ten an bei bawk a ni.

Rane hi Siv Sena chief minister hlui niin, kum 2005 khan an party hi chhuahsanin Congress a zawm a, state minister-te pawh a ni hman a ni.Kum 2017-ah Cognress hi chhuahsan lehin, a fapate pahnih nen party thar an din a, mahse a hnuah BJP-ah an inchhung lut a ni. Tun hnaia prime minister Narendra Modi-a'n cabinet a tihlenah khan union minister-ah lakluh thar a ni.

Shiv Sena MP Vinayak Raut chuan a rilru a buai zo tawh nia sawiin, "BJP hruaitute tihlawm tumin Shiv Sena leh pawl hruaitute chu a bei zui reng a ni. Modi-a ministry-a lakluh a nih hnuah a mental balance a hloh zo tawh," tiin a sawi.