DUTA-in education policy hman duh lohna lantir

Delhi University Teachers' Assocation (DUTA) chuan nimin khan varsity-a New Education Policy hman duh lohna lantirin nawrh an huaihawt.

Thawhṭanni khan Stan­ding Committee on Academic Matters chuan education policy thar kum 2022-23 aṭanga hman ṭan an lo remti tawh a ni. Mahse DUTA chuan policy hi hman a nih hmain level hrang hrang, Department, Faculty leh Staff Council-ahte sawiho phawt an rawt.

Vice chancellor PC Joshni hnenah lehkha an thehlutah, DUTA chuan NEP 2020 leh dan thar dangte chu hmang tura hmanhmawh taka thutlukna siam lo turin an ngen a, sawihona neih phawt a ṭul thu leh, hei hi University tan pawha ṭha zawk tur a nih thu an sawi. Kum 2013-a hmanhmawh taka four year undergraduate programme (FYUP) hman a ni leh, a kum leh 2014 maiah duh lohna nasa tak lantir a nih avanga hnuhdawh leh nghal a nih mai chungchangte pawh hre reng turin an ngen.