Kum 2022 aṭangin Covid Vaccine thawnchhuak dawn : Expert Panel Chief

India chuan ram chhung mipui, puitling chin hnena vaccine pek kim a nih hnuah, Covid-19 vaccine chu nakkum aṭangin ram dangah an thawnchhuak chhunzawm leh thei dawn tih sorkara expert panel hotu chuan a sawi.

"Ram 60 chuangte chuan vaccine lak tur mumal an nei lo a, India chuan kum 2022 hian an mamawh hi eng emaw chen chu a phuhru thei dawn a ni" tiin National Technical Advisory Group on Immunization chairman N.K. Arora chuan Thawhlehni khan sawiin, "Puitling hnenah vaccine kan pekchhuah zawh hnuah, khawvel ramdang daih tur vaccine pekchhuah tur kan nei thei dawn a ni" a ti.

India hian kum 2021 ral hmaiin tualchhunga siam vaccine paruk a nei hman dawn tih Arora chuan a sawi bawk. Vaccine advisory group-a hotu nihna angin sorkar laipui chu vaccine thar enfiah leh, hman mekte data ennawnna kawngah a pui ṭhin .

Khawvela vaccine siamchhuah tamna ber, India-in kumin kumtir lam khan prime minister Narendra Modi vaccine diplomacy hmangin ram retheite hnenah vaccine a thawnchhuak ṭhin a ni. World Health Organization hnuaia vaccine semchhuahna programe, Covax-ah pawh ram hrang hrang zingah a thawh hlawk ber tura beiseina pawh a sang hman hle.

Mahse ram chhungah hri leng thawh hnihna rapthlak tak lo thleng vang leh tualchhunga vaccine supply-te a khawtlai chhoh avangin, sorkar chuan ram mipuite hnena vaccine pek hmasak chu dah pawimawhin, ram pawn lama a thawnchhuah pawh a titawp ta a ni.

Hemi hnu hian Covax chuan ram hrang hranga sem chhuah tur vaccine indaih lohna a tawk chho a, he harsatna phuhru turin China leh ram dangte lam a hawi a ngai ta a ni. Ram chhunga vaccine siam tihpun zel a nih avangin sorkar laipui chuan kumin kumtawpah chuan puitling maktaduai 920 chin chu vaccine dose kima pek hman a tum tih Arora chuan a sawi. Hemi atana mamawh tur chu dose maktaduai 1.8 a nih thu a sawi a, he target hi kuminah hlen hman ngei an tum tih a sawi a ni.