President Kovind-a'n Ram Temple sak mek tlawh dawn

President Ram Nath Kovind chuan Uttar Pradesh-a khawpui pathum - Lucknow, Gorakhpur leh Ayodhya-te chu August 26 - 29 inkarah a tlawh dawn tih President's Secretariat chuan Thawhlehni khan a puang.

August 29 hian President Kovind chuan Lucknow aṭangin Ayodhya chu special train hmangin a pan dawn a, Ram Temple an sakna hmun te tlawhin, Pooja a nei nghal dawn a ni.

Ayodhya-ah hian Uttar Pradesh chief minister Yogi Adityanath kaihhruai sorkar hnuaia Tulsi Smarak Bhavan sakṭhat leh cheiṭhat te, Nagar Bus Stand leh Ayodhya Dham tihchangtlun hna thawh mek te a hawng nghal ang.

Official statement-in a a tarlan danin, President hian vawiin leh naktukah Lucknow-a convocation ceremony pahnih leh Uttar Pradesh chief minister hlui Dr Sampurnanand-a lim (statue) hawnna hun a hmanpui dawn a, Lucknow-a Capt Manoj Pandey Sainik School auditorium hawnna a hmanpui bawk dawn a ni.

August 28 hian President Kovind chuan Mahayogi Guru Gorakhnath AYUSH Mahavidyalaya lung­phum a phum daw na, Gorakhpur-a Mahayogi Gorakhnath Vishwavidyalaya chu a hawng bawk ang.

President Kovind hi thla hnih chhunga UP a tlawh ṭum hnihna tur a ni. June thla khan an chenna khua Kanpur-a Paraunkh a lo tlawh tawh a ni.